حقـيــقة التـعارف بين البنات و الشـبـاب

هل البنت يوم تتعرف على واحد بينتهي هذا التعارف او الحب الى الزواج؟؟؟

ج= أكيد مستحيل لأن البنت يوم تتعرف على واحد وتطلع معاه ، تصغر في عين هذا الشاب ( هذا الشيء يتكون داخل نفسيه الرجل ولو بين او مثل عكس هذا ) وهذا الشيء أكيد وطبيعي لأنها تخلت عن شرفها وعفافها وقبلت انها تكلم و تطلع مع واحد غريب فكيف يتزوجها ، اصلا حتى المخطوبين بشكل رسمي الرجل او الخطيب ما يعرض على خطيبته انها تطلع معاه او تعمل شيء معاه غلط قبل الزواج

فكرة_كل ما تتنازل البنت وترضخ لطلبات اللي متعرفه عليه تصغر زيادة وزيادة في عينه وفي نفسه ( وطبعا هو ما يهمه تصغر في عينه شويه ولا كثير هو اهم شيء عنده ان يتسلى ويستمتع فيها ) .



ليش الشاب يوهم البنت اللي متعرف عليها بالزواج ويعيشها في عالم الحب ؟

ج=لأن الشاب يفكر في البنات او في البنت تفكير جنسي ، وتسليه في شرفها وعرضها ، لـين ما يحصل البنت اللي ما شاف عليها الغلط ويتزوجها ، حتى لو كانت بنت مب زينه مدام هو ما شاف عليها الغلط خلاص عادي ، وكل الشباب يقولون ان اللي ترضى انـها يرقمونها و تطلع معاهم هذي وحدة صايعة ، وهي اصلا تبغي هذا الشيء وترضى لنفسها هذا الشيء ( والرضى يعني الموافق منا على فعل هذا الشيء)، وهو اذا ضيع هذه الفرصة بتروح عند غيره ، وهي تستاهل اللي يجيها او يحصل لها من علاقتها مع الشباب او احد الشباب ، ولهذا السبب يستحلون فيها اي شيء ، على أساس ان اللي تبغي تحافظ على نفسها ما تكون مثل هذي البنت اللي فكرت بالتعارف او تكوين أي علاقة غير شريفة وغير شرعية ومشت في طريق الغلط

الشباب او الشاب هو في أغلب الاوقات هو اللي يطلب ويلح على البنت ، بس مدام هي وافقت في النهاية ، اي شيء يحصلها او يعمله معاها هي من الموافقة الأخيرة للبنت (وهذا رأي الشباب)

وفيه بنات يفكرون (يوهمون انفسهم)ويقتنعون بأن الشخص اللي تكلمه او تحبه هو غير عن كل الشباب اللي تسمع عنهم او تقرأ قصصهم في المجلات***؟

ملاحظة : هذا السبب اللي ضيع الكثير من البنات هذه الثـقة لشخص غريب محرم عليهم لان مب معقوله ان بنت تعمل شيء غلط مع واحد وهي مش مقتـنعة بأن هذا الشخص ما بيتزوجها ، لازم تكون مـقـتـنـعة ، ولو حتى تصديق وعد بالكلام بأنه بيزوجها.

هذا السبب القوي في نفسية البنت و اللي يخلي وخلا الكثير من البنات انهن يتنازلون عن شرفهم وعفافهم ، لأن البنت تشوف هذا المتعرفه عليه غير عن كل الشباب ، هذا لأنها حبته ووثـقت فيه وسلمت نفسها له ، ويوم سلمت نفسها لهذا الشخص الغريب (اصبحت مثل بنات الشوارع في نظر هذا الشاب ونظر الناس وكل واحد عرف بعلاقتها معاه) على أمل والوعد بالزواج ، وللاسف والله الكثير من البنات يغلطون مع بعض الشباب وهم مصدقين ومقتنعين و عندهم امل كبير بالزواج بعد الغلط ، وتقول البنت منهم خلاص هو غلط معايه يعني أكيد بيصلح غلطته وبيتزوجني وان الغلط هذا دليل على قرب الزواج ، وهذا تفكير الجاهلات.

والكثير من البنات اللي اختربن ما تنصح صديقاتها وتحذرهم من هذا الطريق ، بل بالعكس تساعدهم على انهم يتعرفون وتشجعهم على الانحراف و تزين لهم التعارف والحب وغيرذلك ، وهذا الشيء يكون بطريقة مباشرة وغير مباشرة و الأخطر الغير مباشرة بدون ما تذكر لهم مخاطر هذه العلاقات المحرمة، وهذه حالة نفسية في كل شخص خربان او ماشي في طريق او بطريقة غلط غير الطرق المعروفة والشرعية ويحاول يخرب غيره عشان يكون مثله وما يكون في طريق الغلط لوحدة


وهل من المعقوله ان الواحد بيروح عند اهله ويقولهم انا اريد ازوج بنت تعرفت عليها أو شفتها في مكان وعجبتني وابغي ازوجها؟؟؟
ج=أكيد أهل الولد ما بيرضون وبيقولون تبغي تتزوج وحده ما نعرف من وين محصلنها او من وين جايبنها او متعرف عليها او يقولون تريد تتزوج بنت من بنات المراكز والشوارع . طبعا الولد مستحيل يعمل هذا الشي ويوضع نفسه في هذا الموقف اللي بدايته ونهايته معروفه ، لا و بالعكس بعد ، إذا قال لأهله بيتهمون البنت اللي متعرف عليها بأنها بنت حرام تريد تخدع الولد وتريد ترمي بلاها او مصيـبـتها على الولد..الخ

ملاحظة : حتى لو كانت البنت تقول انا بنت حلال وبنت عائلة معروفة محترمة وسمعتي ما عليها كلام ، هذا الرأي حتى لو كان حقيقة او صحيح فهذا مقتصر عليك وعلى اللي حوليك ، بس اهل الولد ما يعرفون هذا الشيء وحتى مابيفهمون هذا الشيء وخاصتنا في مسئلة الزواج ( وخاصتنا لان ولدهم تعرف عليك بالترقيم... وغيره ، وهذا الشيء يدل على ان البنت مب زينه و مب محترمة واخلاقها تعبانة والتعارف بالترقيم وغيره سمة او صفة تـنـتسب لبنات الشوارع والمراكز ..وغيره

وطبعا الشباب عندهم كذبة معروفة لهذي المسئلة يقولون للبنت انه بيقول لأهلة انك صديقت اختي اوعرفـتـك عن طريق اختي وأنتي صديقتها وخلاص وفي طبعا كذبات اخرى على حسب الوضع

تحسون من هذي الكذبة اوالخطة لتغطية العيوب والعيب الكبير في علاقتهم والخروج عن المألوف(وهم ما ذكروها الا لأنهم يعرفون ان في شيء مب طبيعي في علاقتهم) ، وأنها في الأصل كذبة وليش هو مطر للكذب مدام هذا الشيء مب عيب او يجوز (هذي الكذبة مخصصة للبنات) ثاني شيء حتى من هذي الكذبة لو كنتي مصدقـتـنها هو بيكذب على أهله على امه وأبوه ، هل تتوقعين من واحد مثل هذا الكذاب انة ما يقدر يكذب عليك بعد?! ، واذا هو قالك انه يكذب عشان هو يحبك وانة بيكذب على اهله عشانك وعشان هذا الحب ، انا اقول هو يكذب عليك عشان تستمرين معاه في علاقتكم وبس . وفاقد الشيء لا يعطيه، واذا جالك انا برتب مع اهلي او انا متفاهم وياهم ، تتحرين هذا الكلام بهذي السهولة تتحرين انة هو يوم كذب عليك يقدر يكذب على اهله وخاصتـنا مع ابوه أسئلتهم بتختلف عن الأسئلة اللي تسئلين فيها نفسك وتسألينه فيها هذا الكذاب اللي متعرفة عليه ، وشعورك وانتي تسألين هذي الأسئيلة تختلف عن شعور أهلة وخاصتنا ابوه يعني انتي شعورك تريدين منة انة يطمنك بانة مب كذاب ويريد يتزوجك ، لاكن أسئلة الأهلة لازم يكون فيها استنكار لهذا الشيء ولازم في نوع من الرفض يختلف عن نوع سؤالك ، انتي سؤال في نوع من الترجي والطلب عشان يتزوجك


ما هو تفكير الشباب ورأيهم اذا عرفو ان واحد من الشباب متعرف على بنت?

ج= والله للأسف في نسبة كبيرة من الشباب يشجعون بعض على الرذيلة وكل واحد يتمنى ان يتعرف ويعمل نفس الشيء مع هذي البنت لأنهم يقولون بأنه هذي البنت لا أختك ولا من أهلك ولا تقرب لك عشان هذا يعملون فيها او معاها اللي يريدونة وهذه قاعدة لازم كل وحدة تعرفها والله زين ( ***لا اختك ولا زوجتك ولا من اهلك ولا تقربلك***)

وهذي بعض الدلائل والإشارات التي تدل على الواحد بأنه ما بيتزوج بنت متعرف عليها من قبل ؟

إذا كلمت البنت واحد وعطته اللي يريده ، وختلى بها او حصل بينهم شيء غلط ، بس خلاص بعد ليش يتزوجها مدام هو حصل وحدة (فري) وعطته اللي يريده ليش يتزوجها مدام اللي يريده منها خلاص خذاه وبرضها ، وعلى فكره يوم البنت تكتشف او تحس بعد فوات الأوان انها انخدعت وتبدأ تقول وتلح على هذا الشاب اللي خدعها ، انت لازم تتزوجني بسرعة ، يا انه يعمل معاها مشكلة ويختـفي او يهرب منها ويقول لها انا بسافر او بيرد عليها بكل صراحه انتي عطيتـني برضاك وما في احد غصبك على شيء ، وانا بصراحه ما قدر اتزوجك او بصراحة ما أبغي اتزوجك . وهذا اللي اسمعه كثير ودوم من أهل التجارب واللي يرددونه الشباب.

مثال اتخيلي انك تسألين هذا اللي متعرفه عليه وتكلمينه وقلتيله كم صديق عندك محترم وزين مثال اذا قالك عشر اصدقاء ، قوليله ليش ما تعرف واحد منهم او تعرف عشرة على اختك او بنت عمك عليهم وتخليها تختار منهم اللي تشوفه مناسب لها يعني وسيم ، يحبها جدا و يوعدها بأنه يتزوجها ، يعني مثل ما انا اخترتك ورضيت ان اتعرف عليك ليش ما تخلي اختك وبنت عمك بعد مثلي ، عشان يجربون الحب وحلاوته ، اكيد ما بيرضا او ما بيعملها ، لان هذيل من بنات اهلة وله غيرة عليهم ، بس انتي لا اخته ولا زوجته ولا من اهله ولا تقربين له فليش يغار عليك وهو يرضاها لك بس ما بيرضاها على بنت من بنات اهله.


إذا كان صديق الولد اللي متعرفة عليه ، يعرف كل شيء عن علاقته مع البنت وسوالفه معاها ولو كانت بسيطة وعادية بالنسبة لها، لازم تعرف انه اللي متعرفة علية ما بيتزوجها !؟؟
ج=لانه يخاف ان صديقة يطلع علية كلام من وراه او يعايره او يعيب عليه في يوم من الأيام ويقول انت متزوج وحده متعرف عليها - يعني تـنـفهم انها صايعة - وانا قلت في البداية ان اللي تتعرف ولله ان يعتبرونها أغلب الشباب انها وحدة صايعة اذا ما كانو الكل، عشان هذا أي وحده تتعرف على واحد وتعرف ان صديق هذا اللي متعرفه عليه يعرف بالموضوع ، يعني مستحيل يتزوجها ، والله صعب وما في احد من الشباب يرضاها لنفسه كل اصدقاءه وحتى الصيع يوم بيتزوجون يتزوجون وحدة مب متعرفين عليها من قبل ، وما في احد يعرفها ، وهو يتزوج وحدة متعرف عليها واصدقاءه يعرفون بالموضع ويعرفونها او يعرفون عن علاقتهم قبل الزواج او سمعو عنها. وهو اصلا مب يخاف ! هو متأكد ان صديقه او اصدقائه بيتكلمون من وراه بكلام يدل على انه هذي البنت صايعة وهو تزوجها ، ولانه لو هو كان بهذا الوضع لعمل مثلهم.

ومن الدلائل او الاشارات التي تدل على ان الواحد ما بيتزوج وحده متعرف عليها ، اذا عرف ان هذي البنت كانت لها علاقة مع واحد من قبل ((طبعا العلاقة مع واحد ثاني ما اقصد فيها الزوج السابق او اخطيب (الخطيب الرسمي) السابق

السبب : يخاف او بيفكر بنقطة معينة بأن هذي البنت أكيد او يمكن حصل بينها وبين الي متعرفة عليه قبل شيء مب زين ، وبعد ما شبع منها تركها او خلاها ، وبتكون ذريعة الشاب لنفسه لخداع هذي البنت وهو بعد : بأن هذه البنت متعرفة على شاب قبله يعني بنت لها سوابق وبيقول اكيد هو شبع منها وبعدين سابها ، ومب مشكلة اذا كملت اللي بدأءه غيري او اذا كملت عليها ‘ واذا انا ما استغليتها في ألف واحد غيري بيستغلونها ، وهي اكيد في اي وقت تريده بتتعرف على واحد ثاني وهذا الثاني ما بيترك هذي الفرصة وبيستغلها ، وأنا اولا من غيري .

ملاحظة : وفي الكثير من القصص اللي حصلت تدل على صحة هذا الكلام ، وفي قصص تدل عليها صحة هذي الفكرة ،ومن القصص ان واحد يقول لزوجته او خطيبته ، انا كنت احب او كنت متعرف على وحدة من قبل (يمكن قصدة من هذا الاعتراف يريد التأكد من خطيبته ، فالبنت يمكن تقول مدام هو اعترف خليني انا بعد اعترف ، ونطلع كل الخبايا ونكون صريحين مع بعض من البداية ، فالبنت تعترف اذا كانت تحب او كانت عندها علاقة مع واحد من قبل ، وبعدين خطيبها يزعل ويعصب وتحصل مشكلة كبيرة بينهم وأغلب الاحوال يفترجون ، فنصيحة لكل بنت كانت لها علاقة مع واحد من قبل انـها ما تفكر انها تعترف لخطيبها او لزوجها مهما كانت الاحوال ، وحاولي تمثلين انك من بدايت حياتك ونتي شريفة وانك تـنـتـقدين الفساد في المجتمع وتحاولين تنصحين البنات من خطر التعارف والتلفونات وغيره ، وان ملفك نظيف من هذي السوالف .

فكرة البنت من هذا النوع اذا تبغي تعمل اي علاقة مع اي واحد بالحرام بتحصل مليون واحد بس اذا تبغي تتزوج ما بتحصل ولا واحد بطرق التعارف و كل أشكاله، وفي طريقة سهلة وبسيط دوم يستخدمونها الشباب عشان يستدرجون البنت يقول للبنت ابغي اكلمك على التلفون او اطلع معاك عشان نتعرف على بعض اكثر ......الخ

والبنت لا تفكر انها تتعرف على أساس ان اللي يدور بينها وبين واحد تكلمه عن امور الدين لان في الكثير من القصص ان واحد ملتزم يكلم وينصح وحدة او وحدة ملتزمة تنصح واحد وتنتهي علاقتهم في الوقوع في الزنا، يعني البداية يكون الكلام في الدين وبعدين كلام عادي وبعدين شوي شوية لين ما يقعون في الغلط ، فالبنت او الشباب لا يفكرون يخدعون نفسهم.

ونصيحه للبنات اي بنت تبغي تحافظ على نفسها تحافظ على أوامر الله تعالى لين ما يكتبلها الزواج قال الله تعالى (وليستعفف الذين لا يرجون نكاحا حتى يغنيهم الله من فضله) صدق الله العظيم وأرجوا من كل شخص وصلتله هذي الرسالة ان ينشرها ويوزعها على كل شخص يجدر يوصله هذي الرسالة حتى لو كان غني عنها لانه يمكن هذا الغني يرسلها لوحدة محتاجة وحتى اللي مب محتاجة يمكن تضعف في يوم من الايام وكل انسان معرض انه يضعف او ينخدع والدال على الخير كفاعلة والأجر ان شاء الله اجر النصيحة والتنبه من الغلط. .

هيه والله للأسف هالظاهره منتشره وايد

والله يهديهم انشالله

ومشكووره ع الموضوع المفيد

ويارب الكل يستفيد منه

وجعله الله في ميزان حسناتج

^^

واترياا يديدج شيختيهـ

تسلمين حبيبتي
يكفيني بس مروركم

الصراحه الشباب والبنات مالهم امان هالايام
بس الله يهديهم
موضوعج واااااااااااااااايد حلو حبو
تسلمين يالغاليه عهالموضوع